أهلاً بيكوا في أول حلقة من حلقات بودكاست #كلام_ينوّر

كلام ينوّر أول بودكاست عربي مبسط عن الحياة المالية

linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها

، عمر شمس

Introspect Capital هو شريك مؤسس لشركة

? تابعوا شمس على

Omar Shams @ Clubhouse Omar Shams @ LinkedIn

: في الحلقة الأولى بنجاوب على بعض الأسئلة

ليه بودكاست كلام ينوّر؟ -

ليه اخترت اعمل محتوى بالعربي؟ -

كلامنا موجه لمين؟ -

ازاي البودكاست ممكن يساعدك تغير حياتك؟ -

الصحة المالية وتأثرها على الصحة النفسية؟ -

.اكتبولنا آرائكم في التعليقات بعد سماع الحلقة

: للأسئلة والأقتراحات

? [email protected] 

: تابعونا على موقعنا الإلكتروني

? www.kalamyenawar.com

Transcript:

أهلاً بيكوا في أول حلقة من حلقات بودكاست كلام ينور.. أنا عمر شمس هوست (مضيف) كلام ينور

البودكاست ده ببساطة هو رحلة مع الناس اللي بيسمعونا لتبسيط مفاهيم معقدة جداً في الحياة المالية ، أنا عندي أسباب كتير جداً جداً ابتديت البودكاست ده بسببها هحب أناقشها في الحلقة دي وعايز بردة أناقش مين المفروض يسمعنا ، إيه الشكل بتاع البرنامج ، تقدروا تلاقونا فين وتتفاعلوا معانا ازاي

أول حاجه احب ابتدي بيها أنا ليه ابتديت البودكاست ده ، أولاً البودكاست من أحسن وسائل الإعلام أو الطريقة اللي أنا بتعامل بيها مع استهلاكي للسوشيال ميديا يعني أنا كنت بحب جداً جداً اسمع الراديو ولقيت البودكاستس من فترة طويلة جداً وبقيت مستمع منها كتير وهي غيرت حياتي وكنت عاوز اخد الفرصة بردة أني اعرف الناس اللي بتتكلم عربي بالذات قد إيه البودكاستس دي مكان للمعرفة مكان تقدر تجيب منه حاجات كتير جداً فوق مانت تتخيل يعني ، المواضيع كلها اللي انت ممكن تكون بتفكر فيها أو بتحبها او بتستمتع فيها ، تقدر تستهلك البودكاست بطريقة مثلاً خلينا نقول ممكن تسمع برامج كوميدي ، ممكن تسمع مسلسلات ، ممكن تسمع حاجات تعليمية التنوع لا ينتهي ، فلو بتحب الراديو وبتحب تسمع في ودنك حاجات البودكاست هو وسيلة مهم جداً

المحتوى العربي مش موجود منه كتير ، كنت بدور على برامج بالطريقة اللي انا عايز أعمل بيها كلام ينور ملقتش حاجه بالعربي ولكن بالإنجليزي أو باللغات الأخري  في حاجات كتير جداً ففكرت اني ابتدي حاجه زي دي إن انا عايز أنمي المعرفة بتاعة الناس بالحياة المالية ، مصطلحات مهمة زي الاستقلال المالي أو محو الأمية المالية دول مصطلحين كبار جداً في الوطن العربي متعلمناهمش في المدارس ومفهمناهمش بشكل واضح جداً

البودكاست ده بيعمل حاجه بعيداً تماماً عن شغلي اليومي يعني أنا بشتغل في المجال المالي برده بس بشتغل في حاجه تانية خالص غير اللي انا بتكلم فيها أو بتناقش فيها على البودكاست ده ، فالبودكاست ده مش بأي شكل من الأشكال بحاول أبيع فيه أو بحاول أناقش فيه اي حاجه انا بعملها في شغلي اليومي ده حاجه تانية دي هواية عندي شغف كبير جداً بالموضوع ده ، عندي شغف اني أعلم الناس أو اتناقش مع الناس في مواضيع مهمه زي ما في ناس علمتني وفي ناس سمعتها بتتكلم في الموضوع ده حبيت أنقل الخبرة دي للناس اللي بتتكلم عربي بالذات ده أهم سبب اني بحط الوقت عشان أعمل البودكاست ده

الحاجة التانية إني عايز أنظم أفكاري ، أنا عندي أفكار كتير جداً في الحتة دي ، تنظيم الأفكار نفسه أو اني اتكلم عليها بشكل عام في العلن ده بيساعدني اننا أذاكر وأعمل شوية بحث قبل ما اتكلم في الموضوع وبرده ده بينظم أفكاري دي حاجه مهمه جداً جداً أنا حاسس اني هستفيد بيه

ديماً مع الوقت بيجيلي اسئلة كتير جداً ، الناس علشان عارفه اني بشتغل في المجال المالي بيجوا يسألوني عن التمويل الشخصي أو الماليات بتاعة الأفراد ودي مش مجال تخصصي ولكن مع الوقت بنيت فيها معلومات كتير جداً اننا أقدر اشاركها معاكوا من خلال البودكاست ده

الحاجة اللي أنا عايز برده أقولها أنا عايز نبتدي مع بعض شوية روتين ، خطوات صغيرة جداً ممكن تغير بيها حياتك بشكل كبير ، فالبودكاست ده أعتقد هيساعدك تبني الروتين ده ، هيساعدك كمان انك تقيس وتعمل مرجعية كويسه يعني لو انا طويل أنا طويل بالنسبة لأيه ، لو قصير قصير بالنسبة لمين ، الطول والقصر ده ممكن يبقى إعدادات مختلفة الإجابة بتاعتها مختلفة فعاوزك تفكر من حيث النسبية أكتر من المطلق ، يعني لو أنا بحوش أنا بحوش كتير ولا قليل كتير ولا قليل بالنسبة لمين؟ للناس اللي في عمري ولا بالنسبة للناس الأكبر مني ولا بالنسبة للعالم كله أنا عايز أفهمك المفاهيم دي ازاي تفكر بالنسبية لأن ده جزء كبير جداً من  طريقة التفكير المظبوطه

عايز أساعد الناس انهم يحققوا أهداف طويلة المدى مش عايز أتكلم على أي حاجه ليها علاقة بالمدى القصير بمعني أن اي حاجه بنحاول نناقشها هنا بتحاول تغير مفهومك لحاجات طويلة المدى مش حاجات تعملها بسرعة أو حاجات سريعة

الصحة المالية عموماً أو الصحة المالية هو جزء كبير جداً من الصحة النفسية بتاعتك ، يعني لو أنت سعيد في حياتك المالية بتساعدك على تحقيق السعادة في جوانب كتير جداً من حياتك لأن العلاقة بين الفلوس ومختلف جوانب الحياة علاقة ديماً كبيرة جداً ، يعني هتلاقي ديماً العلاقة دي في شغلك في تعاملك مع الأخرين في التخطيط للمستقبل الكلام ده كله ، فالسعادة المالية أعتقد هو جزء لا يتجزأ من سعادتك النفسية بشكل عام ودي حاجه أنا بحب أذكرها ديماً إن مش معنى أن انت بتتكلم في الفلوس انك مادي أو جشع ، كل اللي انت بتعمله انك بتحاول تنظم حياتك المالية فلازم تديها وقت في التفكير قبل التنفيذ مش لازم أخد مرتبي واصرفه كله مره واحده أيا كان الإجابة على السؤال المالي اللي انت بتطرحه ديماً فلازم نفكر ونجهز نفسنا قبل ما نبتدي

الحاجة التانية اننا بشوف إن في ناس كتير جداً ممكن ميكنش عاجبها الموضوع ده اصلاً ولكن هو لو بالصدفة ابتدى يسمع حاجه ليها علاقة بالحياة المالية أو الاستقلال المالي إن ممكن حاجه تعجبك يعني مش ديماً اللي انت فاكره بيعجبك هو فعلا اللي بيعجبك يعني أنت ممكن تبقى بالصدفة بتتمشى وتسمع حاجه معينه والحاجه دي تغير حياتك في ثانية ودي بعض من النقط اللي أنا عايز ابتدي بيها البودكاست ، أنا ممكن أقعد اتكلم 3 / 4 ساعات أنا ليه عايز ابتدي البودكاست ده بس أنا بحاول ألخص نقط سريعة

الميزة إن البودكاست ده انت ممكن تسمعه في ودنك وانت بتعمل الخمستاشر ألف حاجه تانية كمان فحاول تستغل الوقت ، لو البودكاست ده هيساعدك تنزل تتمشى ياريت تنزل تتمشى ، تركب عجلة ، تجري ، تعمل اي حاجه ، تروح الجيم أيا كان اللي انت بتعمله حاول تاخد البودكاست ده انه يساعدك تعمل حاجه جانبه

وبرده خد البودكاست ده ودور لو ابتديت تسمع لأول مره في حياتك تسمع بودكاست ياريت تدور على حاجات تانية تقدر تسمعها يعني ياريت ده يكون خطوة فإن انت تبتدي تتعرف على البودكاست

أنا بستهدف مين في البودكاست ده أنا بستهدف الناس اللي عندها إهتمامات انها تنظم حياتها المالية ، وده أعتقد جزء كبير جداً من الناس سواء انت موظف بتاخد دخل ثابت كل شهر ، سواء انت صاحب عمل ، أو بتشتغل مستقل بتشتغل دوام جزئى في مشاريع مختلفة أعتقد هنجاوب على اسئلة كتير جدا جدا جدا بتهم جميع الشرائح يعني ، جميع الأعمال لو انت عندك 20 سنة لسه مخلص أو بتخلص الجامعة لو انت عندك 40 ، 50 ، 60 أيا كان أعتقد كل الناس لازم يكون عندها دراية بالحياة المالية في كل مرحلة من حياتك لازم تشتغل بطريقة معينة أو لازم تفكر في الفلوس بطريقة معينة

الشكل بتاع البودكاست ده في حلقات هبقى فيها لوحدي بحاول اتكلم على موضوع معين ، في حلقات هتستضيف فيها ضيوف يساعدونا نفهم موضوع معين ، وممكن يكون معايا كو-هوست (مضيف مشترك) حد بنتناقش أنا وهو ثابت بيجي معانا حلقات مختلفة نتناقش في مواضيع مختلفة

أنا بنيت البودكاست ده بناءاً على دراسة استقصائية من الناس القريبين مني سألتهم اسئلة كتيرة جداً بحيث اني ابني الفورمات بتاعة البودكاست ده انه يبقى مناسب لجميع الأذواق على قد ما أقدر طبعاً وبرده انا هستنى منكوا آرائكم على الحلقات شكلها عامل ازاي ، محتاج أغير إيه يعني ياريت ياريت يكون في تفاعل ما بيني وبينكم

تقدروا تلاقونا على صفحات السوشيال ميديا اللي هنزلها في الشو نوتس ، بردة الشو نوتس للناس الجديدة على البودكاست ، البودكاست بيتنشر في أماكن معينة زي أبل ، جوجل ، سبوتيفاي في حتت كتير جداً ممكن تلاقيها أونلاين مع كل حلقة بتلاقي حاجه اسمها الشو نوتس ، الشو نوتس دي بتبقى ملخص لإحنا عملنا ايه في الحلقة دي وتقدروا تتواصلوا معانا وتتفاعلوا ازاي فديماً هتلاقوا أماكن التفاعل بتاعتنا هناك هتلاقوا الإيميل بتاع البرنامج هتلاقوا صفحات السوشيال ميديا فياريت تتواصلوا معانا من خلالها ، بردة هيبقى في موقع إلكتروني تقدروا تخشوا عليه وتسمعوا الحلقات هناك وتقدروا تلاقونا على صفحاتنا أو اماكن التفاعل

دي كانت أول حلقة من كلام ينور أتمنى أشوف آرائكم وتتفاعلوا معانا .. شكراً

Translation of some words and terms:

• Host مضيف

• Format شكل

• Media Mediums وسائل الإعلام

• Let’s say  دعنا نقول

• Shows برامج / عروض

• Variety التنوع

• Content المحتوى

• Financial Independence الاستقلال المالي

• Financial Literacy محو الأمية المالية

• Passion شغف

• Mainly خاصة

• Public عام / علن

• Research بحث

• Personal Finance التمويل الشخصي

• Benchmarking المرجعية

• Setups إعدادات

• in terms to relativity من حيث النسبية

• Absolute مطلق

• Achieve long term goals حقق أهدافًا طويلة المدى

• Short Terms المدى القصير

• Financial Health الصحة المالية

• Mental Health الصحة النفسية

• Topic موضوع

• Targets يستهدف

• Freelancer مستقل

• Part-Time دوام جزئى

• Co Host المضيف المشترك

• Biased on بناءاً على

• Survey دارسة استقصائية

• Posting نشر

تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة

#كلام_ينوّر # بودكاست # بودكاست_عربي # الحياة_المالية # أقتصاد