كلام ينوّر أول بودكاست عربي مبسط عن الحياة المالية

linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها

---

Show Notes:

في ظل الظروف اللي بتمر بيها مصر من تقلبات السوق وقدرة الناس على الصرف، انك تخرج بفكرة تسهل على الناس شراء أو بيع العربيات المستعملة بطريقة موثوقة وتوفر لهم كمان طرق للتمويل حاجه مهمه جداً

النهاردة معانا عمر الدفراوي، الرئيس التنفيذي والمؤسس المشارك  لشركة سيلندر "منصة رقمية لبيع وشراء وتمويل العربيات المستعملة في مصر"
بنتعرف معاه على سوق العربيات المستعملة وايه الحلول اللي بتقدمها سيلندر عشان تسهل عملية بيع وشراء العربيات المستعملة

Defrawy @LinkedIn :تقدروا تتواصلوا مع عمر من هنا

sylndr.com :منصة سيلندر 

01:32 سيلندر بتعمل ايه؟ -

03:25 كل اسم له قصة فكرت في الاسم ازاي؟ -

06:40 قولي 3 مشاكل للمشتري و3 مشاكل للبائع عشان تعيد الثقة للمشتري وللبائع؟ -

11:54 هل مع البائع بتقدر تقدمله عرض وتاخد منه العربيه على طول؟ -

12:20 ازاى بتضمن للبائع أنه يعرف يجيب القيمة بتاعته اللي هي مش بعيد قوي عن السوق؟ -

14:45 هل في تقييم لحالة العربية بالكامل؟ -

20:25 بتمولوا عربيات مستعملة لحد كام سنة؟ -

استنونا الاسبوع الجاي، هنكمل لقائنا في الجزء التاني مع سيلندر

---

تابعوا حلقتنا واكتبولنا آرائكم بعد سماع الحلقة

: للأسئلة والأقتراحات

? [email protected] 

: تابعونا على موقعنا الإلكتروني

? www.kalamyenawar.com

Omar Shams @ Clubhouse Omar Shams @ LinkedIn : تابعوا شمس على

---

Transcript:

شمس: اهلاً بيكوا في حلقة جديدة من بودكاست كلام ينور، النهاردة أنا معايا عمر أولاً عايز أرحب بيك وشكراً جداً إنك اديتني من وقتك وجيت معانا في كلام ينور فأهلاً بيك معانا

عمر: شكراً ليك، منور بوجودك .. عمر وعمر حلقة مختلفة

شمس: اعتقد اول ضيف معانا عمر برضه 

عمر: طب كويس 

شمس: لأ بجد ميرسي جداً على وقتك واحنا أول مره نتعرف على بعض النهاردة من خلال الحلقة دي يعني انا بعتلك وانت مشكوراً يعني رديت عليا في العادي الناس ممكن متكونش بترد على بعض فشكراً أننا ظبطنا الحلقة دي في وقت قصير جداً فشكراً على وجودك معانا

عمر: أنا مبسوط إني معاك

01:32

شمس: السبب النهارده في الحلقه ان انا شفت فيديو ليك على لينكدإن شدتني جدا الفكره اللي انت بتعملها حاسسها مهمة جدا عشان شركتك في مصر في ظل الظروف اللي مصر بتمر بيها من ناحية قدرة الناس على الصرف والكلام ده كله، المنتج بتاعك منتج مميز وفي نفس الوقت بما اني مش مقيم في مصر الفترة دي شفت نفس الخدمه بتاعتك هنا وعجبتني جدا انا شخصيا جربتها وحاجه حبيتها جدا وحبيت التجربة وحبيت انقل للمستمعين بتوعنا فكلمني كده انت بتعمل ايه

عمر: خليني احكيلك الموضوع ابتدى ازاي، ازاي قررنا نعمل اللي احنا عايزين نعمله احنا ابتدينا الاول نبص على الأسواق زي مصر ايه المشاكل الكبيره قوي واللي ناس قبلنا حاولت تحلها، والمشكله اللي احنا قررنا نحلها هي مشكله العربيه المستعملة دي كم مبدئيا المشكله اللي احنا عايزين نحلها 

احنا بنحاول نعمل ايه؟ احنا بنحاول ببساطة نعيد الثقة في سوق العربيات المستعمله هي دي رؤية المشروع بتاعنا ليه شايفين ان دي رؤية المشروع لان اكبر مشكله موجوده هي انعدام الثقة في السوق فاحنا بنحاول نعيد بناء هذه الثقة بين اللي بيشتري وبيبيع عربيه، مش ما بينهم بس للي بيشتري عربية واللى بيبيع عربية لأن احنا مش بنوصل الناس ببعض احنا المشتري واحنا البائع 

فاحنا عاوزين نبني ثقة بين المشتري والبائع ونأكد للناس أنه شريك موثوق به تقدر تعمل معاه المعاملات في العربية المستعملة وتبقى ضامن إن كل حاجة ماشية تمام فده ملخص سريع 

03:25

شمس: انت اسم شركتك إيه؟

عمر: الشركة اسمها سيلندر 

شمس: اوكيه، جايه منين بقى؟ يعني أكيد كل اسم له قصة لما كنت مثلاً مع المؤسسين التانيين او الناس اللي أنت ابتديت معاهم الشركه فكرت في الاسم ازاي؟

عمر: والله بص اكبر نقطه والنقطه اللي الناس دي مبتخدش بالها منها انه اكبر تحدي، اكبر مشكله بتواجهك هي الدومين انك تلاقي دومين بالاسم اللي انت عايزه دوت كوم دي بتبقى اكبر مشكله

شمس: ودي على فكرة كانت مشكله كبيره قوي في كلام ينور 

عمر: الدومين ده كارثة

شمس: اللي أنت بتقوله ده 100% يعني أنا كنت عايز اسم ملاقيهوش لأن الناس سمت كل الأسامي اللي موجودة في العالم 

عمر: بالظبط، فهي دي كانت الفكرة، الناس تقولك طب يا جماعة ما سيلندر أصلاً بالـ (سي) مش بالـ (أس) كان بيجيلي حتى تعليقات اللي هو انتو بتقولوا اسم الشركة غلط لأ يا جماعة هو اصلاً أصل الكلمة مش موجودة دوت كوم فكان اول حاجه ان الواحد يتأكد إن الاسم موجود كدومين بس مش ده الهدف من الاسم

الهدف من الاسم اننا كنا عايزين اسم مرتبط بالعربية ومتعدد اللغات يعني لو انت في مصر وبتتكلم عربي تعرف الكلمة ولو انت في بلد تانية غير مصر تعرف الكلمة فـ سيلندر كانت بالنسبالنا الكلمة اللي بترتبط في دماغنا لما تقول سيلندر  هيجي في دماغك العربية لو بتتكلم عربي هتعرف تقولها لو بتتكلم إنجليزي هتعرف تقولها فدي كانت الفكرة اننا نجيب الكلمة دي يعني 

شمس: معلش هو يبان سؤال بسيط ولكن أنا بحس القرار ده انت بترتبط بيه باقية حياتك يعني إتخاذ الاسم الصح أو البراند مهم جداً فاللي بيسمع برضه وبيحاول يسمي فكرة انا عايز اسمع آراء المؤسسين بيسموا ازاي فاهم قصدي 

عمر: لا هقولك على حاجه كمان احنا كان في حاجة لذيذة اوي انا كان في جزء في سيلندر لما ابتديت كنت لوحدي خالص فجيت بالاسم لوحدي وبعد كده لما باقي المؤسسين جم معايا وقفنا في نفس المشكلة اللي هو طب ما نشوف اسم تاني نشوف حاجه مختلفة وقعدنا وفتحنا إكسيل شيت وكل واحد قال الاسامي بتاعته وفي الاخر طلعنا 5 اسامي والحركة الظريفة اللي احنا عملناها اننا في الوقت ده كنا خلاص بنجيب المستثمرين الاولانيين اللي هيحطوا استثمار في الشركة بعتنالهم پول (استطلاع) وكل واحد يخش يعمل تصويت على اسم الشركة إيه فادينا المستثمرين تجربة انهم يختاروا الاسم معانا، بعتنالهم 4 / 5 اسامي من ضمنهم سيلندر الاسم اللي انا كنت مختاره من الأول هو اللي كسب حتى بعد محاولات الآخرين من الإيقاع بالاسم عرفت أفلت بيه 

شمس: هايل، وعلى فكرة أنا إجابة دوت كوم دي أحلى الإجابات اللي بجد والله العظيم أنا عملت زيك انا حاولت أدور على اسامي كتير مفيش وكنت عايز أسامي بالعربي ومرتبط برضه باللي أنا بعمله والكلام ده كله فالاسم ده كان فاضي وبعدين بيفرق بقى في ال SEO بتاعك بقى وبيفرق معاك في حاجات انا مكنتش متخيلها وانا عجبني الاسم بصراحة وشدني لانه فعلاً بيتفهم من كذا لغة 

06:40

طيب هخش معاك بقى قولتلي المشتري والبائع دول شخصيتين، عايزك تقولي على 3 مشاكل للمشتري و3 مشاكل للبائع اللي هما 80 / 90 % من المشكلة يعني مش عايز أعرف المشاكل الصغيرة انت عايز تشيل الـ 3 حاجات دول فتعيد الثقة للمشتري وللبائع هنقول إيه؟

عمر: هبتدي بالبائع عشان ده نموذج العمل اللي بنهتم بيه الاول، البايع عنده 3 مشاكل

التجربة بتاعته عامله ازاي؟ انت النهاردة لو عايز تبيع عربية ايه الخيارات الموجودة عندك عشان تبيع عربية مستعملة أول حاجه هتفكر فيها انك تروح على منصة من المنصات الموجودة تحط عليها العربية بتاعتك اول حاجه بتواجهك هو سيل هائل من المكالمات في ناس بتشتري خط جديد وتحطه مخصوص على البتاعة دي عشان ياخد مكالمات الناس المهتمه بالعربيه، فأنت واحد ناس كتيره بتقعد تكلمك منهم المهتم واللي مش مهتم، اللي بيكلمك عشان بس يفاصل في العربية ويشوف انت اخرك هتنزل كام على مكالمة التليفون وده جزء من المشكلة 

شمس: وممكن تجار يكلموك

عمر: حاجه طبيعية يعني هيكلمك تجار، هيكلمك مستهلك هيفاصل معاك من الأول فدي أول مشكلة إن انت بتاخد وقت طويل جداً عشان تبيع العربية بطريقة طبيعية

 طيب جالك أربع أو خمس أشخاص محتاج تلاقي أوقات مختلفة للأربع خمس أشخاص الجادين اللي عايزين يتفرجوا على العربية .. هجيلك النهاردة لأ هجيلك بكره لأ طب ممكن أجيلك بعدين ونقعد في القصة دي كلها وبعد ما هيجيلك اللي هيقولك تمام العربية كده من فوق الوش واللي هيقولك لأ انا عايز أخد العربية افحصها يا اما تيجي معايا نوديها للميكانيكي يا إما أجيب الميكانيكي بتاعي ونقعد في القصة دي كلها

وبعد ما نخلص العملية دي الفصال بقى أصل الخربوش ده إيه، وبتسمع بقى حاجات مضحكة يعني أنا فاكر مرة واحد صاحبي كان بيحكيلي واحد جه يشتري منه العربية قاله انا مشكلة العربية بصراحة إن العربية بيضا .. طب أعملك إيه! انا بحب الاسود.. طب أنا أعملك إيه مش بايدي العربية جبتها بيضا وأنت شايفها في الإعلان بيضا فأنا أعملك إيه! فصال فأنت المشاكل إجراءات طويلة أوي محتاجة منك وقت كبير 

وبعدين بيجي كده حته في الأخر حساسة جداً بتاعة العقد ولا الفلوس الأول دايماً بيحصل اللي هو احنا خلاص اتفقنا هنروح الشهر العقاري الأول ولا البنك عشان أنت مش هتعرف تعمل الأتنين مع بعض فانت لو بتتعامل مع مستهلك تاني بتبقى قلقان انه يتنصب عليك، يعني أنت النهاردة لو بتعامل مع شخص وروحت معاه الشهر العقاري ونقلتله العقد 

شمس: العربية بقت باسمه خلاص 

عمر: العربية بقت باسمه خلاص أنا لبست وفي نفس الوقت هو خايف لو بيشتري مني العربية ومش ضامني انا او اني سارق العربية وببيعها وأقوله يحطلي الفلوس الأول بقى اخد بعضي واجري وحلني بقى اثبت اني اخد منك الفلوس دي فهي تاني إجراءات طويلة، وفصال كتير والقلق من تكملة المعاملات 

ودي الـ 3 حاجات اللي احنا حليناها فوراً ان انت بتتعامل مع شخص واحد اللي هو احنا، احنا مش بنحاول نضيعلك وقتك خالص انت بتخش على الموقع عندنا أو بتكلم مركز الاتصالات وبتقولنا مواصفات عربيتك مستوى عالي، العلامة التجارية، طراز، السنة، الكيلومترات نعرف عربيتك ضمن قائمة التسوق لأن احنا في حاجات للاسف لسه مش بنشتريها وبنقدر نجيلك في نفس اليوم، يعني أنت لو كلمتنا النهاردة الساعة 12 هيبعتولك عربية النهاردة بليل النهاردة أخر اليوم هتلاقي عربية عندك تحت البيت مع فريق مختص مهندس وفني بيفحصوا العربية بالكامل ومعاهم كل المعدات يفحصولك العربية تحت البيت وبعدين بنكلمك في التليفون بعديها بشوية ساعات ونقولك يا عمر سعر العربية كذا احنا مش بنفاصل يعني أنا مش بفاصل أنا عندي طريقة كده بعرف اسعر بيها العربية على حسب والله شوفت عربيتك محتاجه تغير كاوتش، الازاز بتاعك مشدوخ،  في خبطة في الفانوس، الزيت محتاج يتغير الحاجات دي كلها وبقولك سعر العربية كذا 

خلصنا كل ده انت في 3 خطوات سهلين كل واحده مبتاخدش منك وقت خالص ومبتتكلمش مع ناس كتيرة بخلصلك وبديلك العرض.. بمجرد اني أديتلك العرض بقولك يا عمر عايز تاخد فلوسك ازاي؟ شيك عادي لو انت البنك بتاعك واحد من البنوك اللي بتشتغل معانا بطلعلك شيك على طول عشان وانت واقف عالكونتر في البنك تتأكد إن الشيك ده سليم، ولو عاوزني أعمل تحويل أونلاين في حسابك ممكن اعملك تحويل أونلاين في حسابك وبيسمع في لحظتها مفيش أي مشكلة وبروح معاك الشهر العقاري بننقل الملكية وكل حاجه فأنت بتلاقي حد تثق فيه، بتلاقي واحد مش بيضيع وقتك وبتقعد تاخد مكالمة تليفون ومش بتفاصل ومش محتاج تقعد وقت كتير وفي نفس الوقت حد تقدر تثق فيه لأن في الأخر لو أنا شركة مش هقدر أنصب عليك لأنك هتروح تشتكيني في حماية المستهلك، هتدخل ع السوشيال ميديا تعملي مشكلة

شمس: أنت كيان اعتباري مش شخص 

طيب أنت هنا قولتلي حاجه، لما بتيجي تفحص العربية هل عندك مثلاً عدد نقط معين انا مثلاً شوفت هنا مثلاً بيقولك هتفحص 100 نقطة / 150 نقطة / 200 نقطة 

عمر: أحنا عندنا 200 نقطة 

شمس: حلو، المهندس ده بيروح معاه قائمة معينة بيعدي على الـ 200 نقطة وبيشوف حالتهم صح كده؟ بيحطلهم درجات مثلاً؟

عمر: هو معاه التابلت عليه التطبيق بتاعنا اللي عليه كل تقارير التعليمات بتاعتنا، كل حتة في العربية بيفحصها اعتمادا على الحالة اللي لقاها ويقولنا في التقرير بتاعه حالة كل قطعة شكلها عامل ازاي

11:54

شمس: حلو، ده من ناحية اللي بيبيع، هل انت بتديله عرض كاش على طول ان هو يقدر تاخد منه العربيه على طول صح؟

عمر: مش كاش مبقدرش ادفع كاش بس عرض فوري أقدر أنفذه على طول 

شمس: حلو، مش قصدي كاش بمعنى كاش اقصد يعني زي ما قلنا بتحويل أو بالشيك أو أياً كان..  انت مبتخليش الراجل يبيع لراجل تاني صح؟ يعني انت مبتوصلوش ببعض  

عمر: لأ أنا سيلندر اللي بشتري، بشتري العربية بعقد مسجل باسم شركة سيلندر 

12:20

شمس: حلو، طيب هسألك هنا سؤال برضه هيجي في دماغ اى حد هيقولي ما انت ممكن تديني قيمة للعربية اقل، انت شركه فأنت عايز تاخدها بارخص سعر ازاى بتضمن للبياع ان هو يعرف يجيب القيمة بتاعته اللي هي مش بعيد قوي عن السوق؟ انت اه طبعا وفرت عليه كل الوقت والمجهود والكلام ده كله بس الناس برضه هتترجم الكلام ده لفلوس ازاى بتقرب من سعر السوق بتاع العربيه الحقيقي؟

عمر: بص هي دي بقى تحدي بالنسبة لنا ومشكله في السوق، مشكله السوق أنك تعرف السعر الحقيقي للعربية محدش بيعرفها ودي المشكله.. انت في دبي صح، بره في حاجات تقدر تعرف منها سعر العربية، وتاريخها يعني أنت لو في إنجلترا وحطيت الكود بتاع العربية 

شمس: اللي هو رقم الشاسية بتاعها 

عمر: تعرف كل حاجه، تعرف تاريخ الصيانات، إيه اللي اتغير وإيه اللي متغيرش هنا في مصر مبتعرفش أي حاجه عن تاريخ العربية فهي الفكرة كلها  ان انت اصلا مفيش قناه تعرف تاخد منها تسعير انت بتاخد تسعير مقدر اللي هو لما بتخش على المواقع اللي عليها اسعار العربيات هتلاقي بقى العرض العربيه ممكن تلاقي نفس العربيه نفس الموديل نفس السنه حد عارضها بـ  500 وحد عارضها بـ  600 ايه الفرق ما بينهم انت مش عارف بس انت خلاص عارف ان العربيه في الرنج ده فانت بتقول والله انا عايز ابيعها بـ 500 فأنا هحطها بـ 550 او 600 عشان لما الناس تفاصل معايا تنزل ال 500 ده المبدأ فقصدي أن في الواقع الاسعار الموجوده هي الاسعار اللي الناس بتطلب بيها بتنفذ بكام محدش يعرف فدي نقطة 

النقطة التانية اللي انت في الواقع كل ما تقعد اكتر كل ما هتسمع سعر اعلى انا النهارده لو عايز ابيع عربيتي مستعد أبيعها في شهر، في الشهر ده عارف ان انا هسمع 100 مكالمة تليفون من 100 مكالمة تليفون هاخد أعلى سعر لو انا مستعد اضيع الوقت ده مقابل الموضوع ده، طبعا انا بخلصلك الموضوع في مكالمة تليفون واحده في اسرع حاجه، هل انا هبقى أعلى سعر مقدرش اضمنلك ده لا انت ممكن يبقى عندك مستهلك تاني بيدور على عربيه عايز يشتريها ممكن يبقى بيحب العربيه قوي بيدور عليها بقاله فتره ومستعد يحط فيها سعر مميز عن اي حد تاني فممكن يجيلك سعر اعلى بس سعري مش بيبقى بعيد لان انا عارف احنا عندنا الموديلات بتاعتنا ونقدر نعرف المستويات العالية للتسعير العربيات بتبقى فين اعتماداً على حالتها وسعرها وعاملة كام كيلومتر، ستايل ولا سبورت فاهم قصدي بنقدر نعرف كده 

شمس: تعرف هي فين

عمر: بالظبط كده 

14:45

شمس: طيب هل مثلاً بتقييم العربية بعد ما بتعدي على الـ 200 نقطة دي بتقول مثلاً العربية دي 5 نجوم، العربية دي 4 نجوم،  العربية دي 3 نجوم، العربية دي نجمتين.. يعني هل بيبقى في حالة للعربية بالكامل؟

عمر: دي حاجه احنا بنحاول نبنيها أن يبقى عندنا نقاط للعربية كلها، لسه معندناش ده بس بنعرف نشوف المتغيرات اللي في العربية المختلفة اللي بتأثر على السعر يعني مثلاً احنا في مصر للأسف العربية نوع الرش ايه بيأثر على حالة العربية سواء ده صح او غلط يعني العربية رشه يقولك لا سعرها على طول بينزل يعني انت ممكن العربية ميكونش فيها أي حاجه بس عشان كلمة العربية دي رشه يقول لك لا يا عم العربية دي عامله حادثه

 شويه حاجات زي الرش زي الموتور زي الكاوتش النهاردة الكاوتش ممكن يبقى بـ 40 و 50 ألف جنيه فده رقم كبير عشان أخد العربية ولسه هجيبلها كاوتش جديد عشان يركب عربية كبيرة ففي شوية متغيرات كده عارفين انهم بيأثروا على السعر ومنهم بنعرف نطلع حالة العربية إيه بس اني اعمل نقط للعربية بالكامل فوراً دي حاجه عاوزين نعملها بس بناخد وقت لحد ما نعرف نطلع لكل عربية

شمس: تمام، طيب ده الراجل اللي بيبيع، الراجل المشتري بقى اللى هو النهارده انت بتحل مشكله كبيره بالنسباله اللي هي القدرة على الشراء يعني انا النهارده العربية الزيرو برقم والعربية المستعملة برقم تاني، حتى لو العربية دي ماشيه سنه او سنتين ممكن متبقاش ماشيه كتير ممكن يبقى استعمالها كويس، انا عن نفسي كنت بخاف اشترى عربية مستعملة يعني ممكن الميزانية بتاعتي رقم معين لا انا ممكن انزل في الامكانيات بتاعت العربية بس عشان اجيب عربيه جديده متبوظش مني، يبقى معاها عقد صيانة، بوديها وانا بعمل صيانتها من الاول والكلام ده كله ولكن لما عشت بره شويه لا فهمت أنه انت ممكن تاخد عربية مستعملة كويسة هي الفكرة ان انت زي ما الراجل اللي كان بيبيع اخد شوية وقت الراجل اللي بيشتري برضه بيديها شوية وقت بس مع وجود شركات زي الشركه بتاعتك قصلي الوقت ده كتير لانه بالفعل انت عامل الـ 200 نقطة وانا قاعد بتكلم معاك يا عمر ايه رأيك انت كشركة والكلام ده كله.. فحليت بقى المشاكل بتاعه المشتري ازاي؟ اللي هي تقريبا انا قلتهالك قبل ما نشرحها بس برضه عايزين ناخد منك الـ 3 نقط بتوع المشتري

عمر: بص اكبر مشكلة كانت موجودة عند المشتري عدم وجود عربيات مستعمله بحاله كويسه، انا مش لاقى عربيه مستعمله حالتها كويسه فدي اكبر مشكله موجوده 

شمس: مع ان انت الاعلانات كلها في الجرايد استعمال طبي 

عمر: لأ ما هو استعمال طبيب دي خدعه بيقول لك استعمال طبيب فتعالي خد العربيه مفيهاش مشاكل، عدد الناس اللي قالتلي استعمال طبيب وطلعت العربيه رشه كلها 

شمس: طب انا مش فاهم في كمان كلمة العظيم كنت بقراها زمان لعظيم طيب اللي مش عظيم مش هينفع يشتري الشقة دي أو العربية دي مش عارف يعني

عمر: مش عارف ليه فعلاً سموها استعمال طبيب، ليه مش استعمال مهندس! يعني قصدي ان المشكلة انك تلاقي عربية باستعمال طبيب صح، دي أكبر مشكلة، تاني مشكلة إن انت بقى عشان تلاقي عربية فرضاً لقيت العربية ايه ده دي استعمال طبيب فعلا شكلها تمام طيب هاخد معايا ميكانيكي يطمني ان العربيه تمام مبدئيا الميكانيكي انت متعرفوش انت بتشوف ميكانيكي بتسأل عليه فدي اصلا مشكله انك تثق في الميكانيكي اصلا هو مش صاحبك الانتيم

فأنت بتروح تجيب ميكانيكي يفحص العربية بيقولك يا باشا العربيه تمام مفيش اي حاجه خالص بغض النظر بقى هي تمام او لا انت مش عارف هي تمام او مش تمام انت فعلا مش عارف انت بتعتمد على رأيي الميكانيكي اللي مش هيقدر يقولك يا باشا اشتري العربية على ضمانتي مفيش ميكانيكى هيقولك كده لان لو قالك كده والعربيه طلع فيها مشكله هترجعهاله ومفيش ميكانيكي هيشيل المسؤوليه دي فدي كانت المشكله التانيه 

المشكلة التالتة هي التمويل، القدرة على تمويل العربيه انت النهارده مشكلة السوق المستعمل في مصر ان عدد المؤسسات المالية في مصر اللي مستعده تسلف العربيه مستعمله قليله جدا مش علشان هم غلطانين عشان المنتج اللي هو العربية المستعملة هما مش عارفينه يعني البنك مش هيخش يفحص عربيه عربيه، صح البنك عايز يطمن أن الأصل اللي هو بيموله العربية اللي انت بتشتريها دي حالتها كويسه عشان هو يقدر يديلك تمويل للعربيه دي 

شمس: عشان انت لو تعسرت في القرض بتاعك يقدر ياخد منك العربيه بتاعتك يلاقي فيها حاجه 

عمر: بالظبط كده، ودي كانت اكبر مشكله عندنا في البنوك عشان كده البنوك عندنا في مصر بتحب تقسط العربيات الجديدة وفي الواقع تقسيط العربيات الجديده شغال زي الفل في مصر بس في المستعمل قليل جدا فدي كانت المشكلة حتى لما اتكلمنا مع الشركات في الاول زي فاليو مثلا كان بالعكس لما جينا نقولهم دي مراحل الفحص بتاعتنا بتاعه العربيه 1 2 3 4 دي الكواليتي بتاعتنا خلاص اطمنوا الناس دي عارفه هى بتعمل ايه فهم دول اكبر 3 مشاكل بيواجهوا المستهلك أنه يلاقي عربيه نضيفه، ان هو يعرف يقول ان العربيه دي تمام وهو اصلا معندوش الخبرة وأنه يعرف يشتري عربيه في متناول الميزانية بتاعته أو يلاقيلها تمويل يعرف يشتريها بيه

20:25

شمس: طيب الشركاء بتوعك أو الناس اللي داخلين يمولوا بيمولوا عربيات مستعملة لحد سن قد ايه؟ يعني العربية مثلاً ماشية 3 سنين  

عمر: 12 سنة، 10 سنين 

شمس: لحد 10 سنين عادي

عمر: أي حاجة موجودة عندنا على الموقع بيقدروا يقسطوها مفيش مشكلة، احنا بنشتغل لحد 10 / 11 / 12 سنة ساعات اه

شمس: مفيش مشكلة فتقدر النهاردة في 2023 تجيب عربية 2015 وتقسطها عادي مفيش مشكلة 

عمر: مفيش أي مشكلة خالص

شمس: اصلاً ده لوحده قيمه كبيره لاي حد بصراحه يعني هي الناس بس مش فاهمه وانا حتى اتكلمت في حلقة قديمة على العربيات وشراء العربيات والكلام ده كله ان العربيه في الاخر هي مصروف هي كده كده حاجه سعرها بيقل ولكن ممكن تشوفها بالجنيه بتطلع بس هي القيمة الشرائية بتاعتها بتقل مع الوقت 

عمر: أصل استهلاكي 

شمس: بالظبط، هو مش أصل يعني، فالناس في مصر معندهاش الفكر انها أكنها بتأجر العربية فاهم قصدي يعني فأنت خليتهم هنا يعرفوا يعملوا الكلام ده على عربية مستعملة 

حلو جداً، ده كلام جميل جداً، و3 مشاكل رائعة 

عمر: احنا بقى عملنا إيه؟ عملنا إيه علشان نحل الـ 3 مشاكل دول احنا بنشتريها من المستهلك وبعد ما نشتريها بتخش عندنا بيتعملها تقييم تاني جوه عندنا بنشوف العربية محتاجه يتغير فيها إيه، ايه اللي محتاج يتظبط بنظبطه 

بعد كده العربية بتخش عندنا في الاستوديو بتتصور 360 درجة من جوه ومن بره  وبصورلك كل خدشه في العربية أنا أول حاجه قولتلهالك الثقة فأنا عايز أكسب ثقتك فأنا بقولك يا عمر ادي كل خدشة في العربية هي كل خربوش هتلاقي ع الموقع بيقولك كل حاجه في العربية حالتها عاملة ازاي فأنا بقولك أدي العربية أهي، أدي حالتها فأنا مطلعلك عربية الجودة بتاعتها كويسة تقدر تشتريها   ولو فيها اي عيوب أدي العيوب الموجودة فيها 

شمس: بتصورلي العيوب عشان ابقى شايفها 

عمر: انت بتخش على الموقع عندنا هتلاقي العربيات متصورة من جوه ومن بره 360 درجة، كل العيوب متصوره، وتقرير بحالة العربية كاملة فده أول جزء اني بحاول أديلك عربية الجودة بتاعتها كويسة ومش محتاج تبقى خبير لأن أنا جيت قولتلك العربية فيها إيه مافهاش ايه ومدام انا طلعت العربية من عندي انت مطمن لأن العربيات اللي احنا بنبيعها بنقول عليها عربية معتمدة من سيلندر وعربية معتمدة من سيلندر دي فيها 3 نقط 

العربية دي عدت على 200 نقطة فحص عندنا قبل ما تطلعلك كعميل 

العربية دي عليها ضمان، أنا مش بقولك لو العربية دي حصلها حاجه إلبس لأ أنا بقولك العربية دي عليها ضمان 90 يوم و90 يوم شامل في ناس بتدي ضمان على الموتور والفتيس ولمعلومات الناس الضمان بتاع الموتور و الفتيس ده زي قلته لأنك لو مش هتضمنلي في العربية الموتور والفتيس هتضمنلي إيه ماهي العربية مفيهاش غير موتور وفتيس لأ احنا موتور وفتيس ونظام الفرامل والشاسية وكل حاجه فبيجيلك ضمان شامل لمدة 90 يوم 

والحاجه الزيادة إني بقولك يا عمر انت اشتريت مني العربية جيت واشتريتها وعجبتك مشيت بيها يومين تلاته وحاسس إن العربية مش عجباك مفيش أي مشكلة لف وأرجع هاتلي العربية وخد فلوسك عندك لمدة 7 ايام  ليك الحق ترجع عربيتك وتاخد فلوسك بالكامل 

شمس: محستش نفسي فيها، سايقها مش مبسوط 

عمر: تعالى رجعها 

شمس: مضايق منها أجي أرجعها عادي 

عمر: احنا ليه عملنا كده؟ عشان مينفعش انك النهاردة تكون بتشتري عربية بـ 400 ألف جنيه و 500 ألف جنيه و 600 ألف جنيه  وأنت مش مستريح  انت لما بتشتري تيشيرت من زارا بتعرف ترجعها بعد 14 يوم ودي تكلفة صغيرة مينفعش اكون بعمل استثمار بالحجم ده وانا مش قادر أبقى مستريح أننا بعمل القرار وانا متأكد منه فبقولك اتأكد خد العربية 7 أيام ولو مش عاجباك رجعها انت تمام

شمس: من غير أي أسئلة، من غير ما تقولي انت بترجعها ليه من غير اي حاجه

عمر: من غير أي أسئلة، كده كده لو أنت لقيت حاجه في العربية رجعهالي ده شيء مفروغ منه 

شمس: انا قصدي انه حتى لو مزاجي رايق مش عجباني معجبتش مراتي رجعت في البيت أخدت كلمتين اي حاجه حصلت

عمر: آه كنت عاملها مفاجئة وقالتلك انت أهبل احنا علينا أقساط بيت إيه اللي خلاك تجيب عربية بدل ما  متبقاش عارف تعمل إيه أرجع هاتلنا العربية

شمس: هايل واهو ده اللي هو سياسة الاسترجاع زي ما بتقول لو في زارا او اي حاجه هو مبيسألكش إيه المشكلة في اللي انت اشتريته 

عمر: بالظبط

شمس: تمام، حلو جداً 

شكراً على وقتكوا معانا النهاردة و اشوفكوا الاسبوع الجاي 

---

Translation of some words and terms:

• Affordability القدرة على تحمل التكاليف

• Vision Of The Business رؤية العمل

• Connect توصيل 

• Trustable Partner شريك موثوق به

• Transactions المعاملات

• Brief مختصر

• Founders المؤسسون 

• Relate مرتبط

• Multilingual متعدد اللغات

• Poll استطلاع

• Business Model نموذج العمل

• Experience التجربة 

• Options خيارات

• Consumer مستهلك

• Process العمليات

• Sensitive  حساسة 

• Spot On على الفور 

• High Level مستوى عال

• Brand العلامة التجارية

• Model طراز 

• Within Shopping List ضمن قائمة التسوق

• Call Center مركز الاتصال

• Technician فني

• Equipment  المعدات 

• Offer العرض

• Score درجة

• Instructions Report  تقرير التعليمات

• Depending اعتمادا

• Instant الفورية

• Channel قناة

• Pricing تسعير

• Estimating Pricing تسعير مقدر

• Premium Price سعر مميز

• Variables المتغيرات

• Depreciation Asset أصل استهلاكي

• Assessment تقييم

• Imperfections عيوب

• Customerزبون 

• Braking System نظام الفرامل

---

تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة

#كلام_ينوّر #بودكاست #بودكاست_عربي #بودكاست_بالعربي #سيلندر #الجزء_الأول