إنتِ عصبية ومش عارفة السبب؟ هل الاحتياج للحميمية هو السر؟ | المستخبي عمرك حسيتي إنك بقيتي عصبية زيادة عن اللزوم؟ بتتضايقي من أبسط كلمة، ومش طايقة حد، وممكن تتخانقي مع جوزك على موقف صغير، وبعد ما تهدي تسألي نفسك: أنا مالي؟ وليه بقيت كده؟ الحقيقة إن ساعات الموقف اللي بيفجّر عصبيتنا مش هو السبب الحقيقي لكل اللي جوانا. ممكن تكوني مستنزفة من المسؤوليات، أو حاسة إن محدش مقدّر تعبك، أو مفتقدة الاهتمام والاحتواء، أو شايلة جواكي خلافات قديمة ما اتحلتش. وممكن كمان يكون الاحتياج للحنان والقرب العاطفي والحميمية جزءًا من الصورة، خصوصًا لما تحسي إنك بعيدة عن جوزك، أو إن العلاقة بينكم بقت مجرد مسؤوليات من غير مشاعر واهتمام. لكن هل كل عصبية سببها الاحتياج للحميمية؟ طبعًا لأ، لأن فيه أسباب نفسية وصحية وضغوط حياتية ممكن تأثر على مزاجك، والمهم إنك تفهمي إيه اللي بيحصل جواكي. في الحلقة دي من سلسلة -المستخبي- هنتكلم عن: ليه بقيتي عصبية ومش طايقة حد؟ إيه علاقة الاحتياج للحميمية بالعصبية والضيق وتقلب المزاج؟ إزاي الإهمال العاطفي وتراكم الخلافات بيأثروا على مشاعرك؟ إزاي تعرفي إنتِ محتاجة إيه فعلًا؟ تعملي إيه علشان تعبّري عن احتياجاتك من غير ما كل نقاش يتحول لخناقة؟ تمرين عملي يساعدك تفهمي مشاعرك وتكتشفي أسباب ضيقك. الحلقة دي مش علشان تلومي نفسك، لكن علشان تفهميها وتعرفي إيه اللي محتاج يتغير في حياتك وعلاقتك. قوليلي في التعليقات: عمرك حسيتي إنك عصبية ومخنوقة ومش عارفة السبب؟ وإيه أكتر حاجة بتحسي إنها بتضغط عليكي؟ معاكم سماح النزلاوي - استشاري أسري.