إهداء للذي رحل قبل مشاركتي تحقيق أحلامي و كل ما أردت مشاركته معه Music: Shihab Tarek الكلمات : كل شىء بعد الفراق بيختلف كل المشاهد و الصور ناقصة بيتك مستني صوت مفتاحك .. و الساعة مستنية تلبسها الشاي مش لاقي حد يشتاقله مكتبك .. ورقك و أقلامك ملوا الإنتظار و اليأس شتتهم بدور عليك فى كل مكان و بتخيل وجودك وسطهم كل الناس اتحولت شبهك كل القمصان بقت كاروهات براجع كل يوم شريط ذكرى و اخاف انسى و اخاف لأتوه بدون طيفك و رغم الخوف لقيتني بتوه كل المشاهد المفرحة بقت تستدعي البكا ببكي بكل الشعور بالذنب و الألم و الفقد ببكي ع اللي حسيته لوحدي .. و ببكي ع اللي حسيناه سوا فتني بدون وداع او حتى نظرة تفهمني انه قد حان الأوان و مهما بكيت و شكيت لا حروفي هتكفي و لا دموعي هتوفي المزيكا برا عالية مبتهداش .. وانا مازيكتي ملهاش صوت كانت ايديك بتلحن و انا طفلة مفتونة بأغانيك ارجعلي .. او خدني بعيد لدنيا تانية يكون فيها كل اللي فارقوني عشان من تاني يحيوني معرفش إن كنت سامع ولا الحسبة عندك غير بس اتمنى تسمعني و تبعتلي مية جواب و تسأل ع اللي باقي مني و تعوضني عن اللي ضاع فالفقد غير فيا كتير او حولني لواحد تاني مش حاسس غير بنغزة و كلام و مشاعر كتير خنقاه نفسي اسمعك .. و اسمع حكاياتك وحشني صوت ضحكتك .. و حشني صوت خطوتك و الشيخ فلان ع الصبح نفسي اسمع حكاية قبل النوم لطفل سعيد وكان اسمه سعيد كان ليا رواية رسمالك فيا دور اساسي بدون دوبلير و في ليلة اتبدلت أوراق النص و ابيضت صفحات دورك و كأن الحبر ملوهش وجود و اتسابت ع المسرح وسط الجماهير .. مش عارفة اكمل دوري ازاي و انا وسط قصة غريبة مبقتش تشبهني وبين القصة و القصة يادوب لحظات عقلي مش فاهم ازاي ابدأ فصل جديد بدون بطل الرواية و أصلها كل حاجة حاجة بتستناك .. كل حاجة بتفكرني بيك قال يعني كنت نسيت مر الربيع و الصيف و الخريف هنا فى قلبي كل اللي عدى من بعد الفراق محسبتهوش مفيش ليلة كانت سهلة و لا فيه ليلة مفكرتش فيك الوقت مبينسيش .. الوجع مبيهداش كل اللي شال الشيلة دي عارف .. كل اللي شال الشيلة دي فاهم ان الوقت بيتقلها على كتفك ان كنت فاكر انها هتخف فى يوم كتبتلك ببعتلك سلام و حضن وداع كان نفسي يكونوا حقيقة عدت أيام و جيتلي فى منامي تقولي سلام و تديني حضن كان نفسي فيه ... كأنه مهانش عليك تسيبني من غير وداع