Music: Shihab Tarek الكلمات : عاوز اقولك انى من سنين مكنتش فاهم عقلي الصغير وقتها مكنش عارف يستوعب رحمته فى وقت ما اختفت كل علامات النور و ملقيتش لنفسي طريق كان دايما موجود عمري ما صدقت اني ممكن فى يوم اوصل الطريق من طوله و صعوبته مقدرتش اشوفله نهاية مقدرتش احس اني اقدر مين قال انها لما بتضيق بتضيق من كل حتة ؟ كانت دايما لما بتضيق من ناحية بيوسعها عليا فى امور تانية و مع الوقت كان بيفرج اللي ضاق كنت دايما اقول لنفسي اني مش كفاية و اني خلاص مش لازم اكمل بس كان دايما بيلحقني .. بآية تطمني و تقولي اصبر و كمل و هتشوف نتيجة ده بعدين صبرت .. و كملت و مقدرش اقولك انى متعبتش فى النص اكيد تعبت بس كان دايما بيلحقني بكل الطرق لو مرة كان بآية فالمرة اللي بعدها بحاجة بحبها مكنتش متوقعها مرة يبعتلي ناس تشد على ايدي و تكمل معايا او حتى يقولولي كلمة تخليني اكمل كان حتى بيراضيني بحاجات تبان بسيطة جدا بس هو عارف اني بحبها العالم و احداث حياتنا مش دايما هتكون على قدر استيعابنا ولا هتكون دايما ليها تبريرات منطقية ممكن حاجة تحصلك ميبقاش ليها مبرر دلوقتي بس بعدها بشهر .. بسنة او حتى بعد سنين هتفهمها و الاهم انك ممكن متفهمهاش عمرك كله بس هو فاهم بالظبط ايه سببها انت ممكن تعيش طول عمرك مكتئب بس فى النهاية محدش هيسقفلك محدش هيديك كاس انك عيشت مكتئب طول عمرك هتعيش لحد ما تكتشف فى لحظة انك ضيعت حاجات كتير اوي كان ممكن تعيشها بس انت قررت تحط نفسك فى قالب غويط محدش عارفله آخر و يمكن تلاقي نفسك ضيعت حياتك كلها احنا اه جينا الدنيا دي عشان نتعب و نتحط فى اختبارات بس فى النهاية انت بردو مش لوحدك تخيل لو كنت لوحدك كان الموضوع هيبقى صعب ازاي من غير توفيقه من غير كرمه و رحمته استعن و توكل و خليك دايما فاكر وجوده و انه دايما هيلحقك ومش هيسيبك لوحدك مهما طال الامر و مهما اتقفلت البيبان